Make your own free website on Tripod.com
HINTALOK BAJARANG
Ulahan: Ujik Jabis


    “Noi, ikam nih saja bapala taholah. Ca am diganangakan urang dihiga”, ranai garutuk Inoi dimamayi Udot lakinya nang basisingut labat tuh rahat mantuk ka rumah. “Hudah balinguan aku madahi magun jua kada ma’asi…saja talinga rinjing ikam nih. Mun urang lain mau batumbi dahi ku dikil”, Udot magun bamamai. “Inta ampun lah bang ai. Dudi-dudi kada lagi dah”, ilon Inoi bilang maras banar bunginya. “Cah..mun surahan ikam tu ti kada pacaya ako,” garunum Udot. “Nanginih babujur bang ai. Kada dusta kada,” ujar Inoi pina ba'iya banar tukohnya. “Ok..mun ikam babujur handak baampih aku maafkan...lain kali daham bakantut lagi dalam kurita taholah. Mun kantot ikam arom kada apa jua nih bilang handak muak aku..handak raum gin ada”, ujar Udot pina balambut ilonnya. Inoi ranai mandangarakan. Inoi taho itu salahnya. Kada hingkat bakulim lagi dah. Kali nih Inoi babujur handak baampih..nahap hudah pandirian. Kada hingkat diugah-ugah lagi dah. Muyak hudah Inoi dibihau awan lakinya. Bilang sunging talinga.

    Nang sabujurnya Inoi nih katuju babanar mahantos hintalu bajarang. Napang mun tahaga tuh bilang kada hingkat ditangat-tangat lagi dah. Sabigi-sabigi hintalu disulum ka muntong...kada aci mamah sako...aci taguk tarus. Akibat katuju mamakan hintalo bajarang ni lah Inoi nih jadi pangantutan banar. Libut-libut bakantut. Baunya makaam..harok babanar. Parak malima bulan hudah Inoi kada mamakan hintalu bajarang. Inya gin ampih hudah pangantutan..mun ada gin kada am karap banar. Mun tulak ka urang aroh gin kabila dijulungi urang awan hintalo bajarang kada diambil kada. Dihijakan banar ai di atas meja.

    Aritoh Inoi pugaan mambawa kurita surang ka wadah gawian. Kurita kancil seken nang hanyar ditukarakan lakinya hadiah pasal inya ampih pangantutan. Maginnya ai banahap azam Inoi. Sayang banar Udot nu Inoi damini. Wayah rahat Inoi mandaribal kurita handak bulik matan bagawi tarasa lain kurita nya..asa injin garagaian tukohnya. “Nih kada magan nih. Kana dibawa ka bengkel nih..mun kayina tamandak tangah jalan hapus muhaku,” ujar Inoi dalam hati. Sampai haja ka bengkel Inoi gin tarus bapadah nu pomen akan masalah kuritanya. Pomen ba’iya mamariksa kuritanya. “Kaka, rakainya nih intang injin ka ai. Taruk nih..hawat gawian nih. Rasanya lambat nih hanyar talah”, ujar pomen. “Kada kisah ding ai. Hadangi ku pang sampai talah”, ujar Inoi pulang.

    Palingau-palingau Inoi maniring sakaliling. Sakalinya Inoi tatiring ada warung makan kada jauh matan bengkel tuh. “Bagus jua nih. Pahadangan kurita talah dibiki’i jaka aku nginum ha hulu..malaran jua”. Inoi gin bagamat bajalan maampah ka warung tuh. “ Ngah..teh tarik sato”, Inoi bakuya nu tukeh warung. Inoi gin baistilah mancari meja kusung gasan baduduk. Duduk haja diitihinya ada hintalu bajarang baandakan diatas meja. Umai maka kada karuan rasa si Inoi. Tarus taganang lawan kanyamanan inguh hintalo bajarang. Manciar muntong kacar liur Inoi. Bilang dandaman banar hudah. Paparutan gin inda galurukan tukohnya inta diisi’i. “hantos ka kada..hantos ka kada”. “Lakiku bukannya ada disia gin. Mun ako mamakan kada katahuan kada. Asa kapingin banar nih”. Salawas nih Inoi baparagah banar ai kada mamakan hintalo bajarang. Pasalnya lakinya ada dihiga. Tu nang kada wani mamakan tuh. Mangilar jua am. Inoi bagamat manjapai hintalo bajarang tu ti. Diambilnya..dikuritis kulitnya...umai tarus disulum ka muntong. Bilang gaha’ banar tukohnya. Talah sabigi mamamah sabigi pulang diambilnya. Kada karasanan parak maanam bigi hudah dihantosnya. “Ergghhh”, Inoi kakanyangan. Puas banar Inoi. Talah manahuri Inoi gin babulik ka bengkel tuh.

    Kada saapa imbahtu basadinan tadangar hanponnya babungi..tritt..tritt..trittt. Hancap Inoi baucap. “Helo..helo..”. “Helo...Noi...nih abang nih. Ikam dimana nih”, tadangar suara lakinya di hanpon. “Ako di bengkel kurita bang ai. Tahuam napakah tadih rahat mandaribal tarasa pina balain banar bunginya..tarus ku antar ka sia,” ujar Inoi pulang. “Kayini ha..ikam hadangilah disana. Ako datang ma’ambili ". “Ayu haja”, balas Inoi. Kada saapa imbah tuh bangsol lakinya. Tarus Inoi manunti’i langsung babuat ka kurita. Pahadangan handak sampai ka rumah Inoi tarasa sakit di paparutan. Parutnya galuruk-galuruk. Handak takantut tukohnya. “Umai napa nih..handak takantot banar nih. Mun aku takantot nih mau tahungkar kisahku mamakan hintalo bajarang tadih. Sunging pang talingaku dibihau lakiku. Kada magan nih”, bilang tapaluh Inoi manahan kantot. Inoi tuhuk manahan kalimutnya daham tabuka lawang. Duduk gin kada tapi karuan lagi dah..kulang kisar tukohnya. Takariut muha Inoi manahan kantot. Parak sampai ka rumah Udot bakuya “aku nih ada surprise hagan ikam..tagal mata ikam kana diikat hulu lawan kain hirang nih.” Inoi maangguk haja. Kada kawa basurah lagi dah..takurihing banar ai. Sampai dirumah imbah maandak kurita Udot gin ma’irit Inoi masuk ka dalam rumah. “Sabarlah..kayina mun sampai dirumah hanyar ku buka ikatan nih”, ujar Udot bakuya. Sampai ka ruang tamu Udot bakuya lagi......“Noi aku handak bakamih satumat.....ikam hadangilah disia. Daham dibukalah ikatan tuh .” Udot gin badadas bajalan ka jamban. “Nih paluang bagus nih. Aku nih handak bakantot banar nih. Kada hingkat ditahan-tahan lagi dah .Jamban tuh jauh dibalakang. Mun aku bakantut gin kada inya lakiku tahu”, Inoi bakuya dlm hati. Inoi baiya mahawasi mandangarakan langkah lakinya. Kabila hudah yakin banar lakinya hudah babuat ka dalam jamban Inoi gin bahimat malapaskan kantotnya tuh.

    "Buuutttttttt...buutttttt...buttttttt”, umai maka panjang harakatnya. “Aaahhhhhhh..ampih sakit paparutan”, muha Inoi takurihing kanyamanan. Kada saapa imbahtuh datang lakinya. Tarus dibuka Udot ikatan dimata Inoi. Takirip-kirip mata inoi sambil digisang-gisang lawan tangan ma’itihi di sakaliling. Sakali ditiringnya diruang tamu tuh panuh hibak lawan urang. Masing-masing ada baisi hadiah. Umai hanyar Inoi taganang nang hari nih harijadinya…..umai maka kada manggarong ha lagi Inoi kahabangan muha.



Sat Aug 24 09:36:13 2002
Sumber: Banjar International